تبي تعرف عن كل شي بالماسنجر بلس ادخلو مانت نادم

صباح الخير

في بعض المستخدمين للماسنجر ما يدرون هالبلس ذا وش هو من لحية
والا وش زوده عن الماسنجر العادي و وش المميزات اللي يعطيك اياها

والبعض منزلين البلس بس عشان التوبيكات الملونه ومايدري وش هو مفوت عليه
عشان كذا قلت ياولد دامك فاضي خل الإقلاعيين يشوفون هالبلس وش يفيدهم فيه و وش يقدر يسوي

البلس عبارة عن اداة اضافية للماسنجر تضيف له العديد من المميزات . يعني لاتشيل الماسنجر اللي عندك و تركب ذا

اهمها انه يعرض لك التوبيكات الملونه ويتيح لك تلوين توبيكك ..
بيقمز لي واحد يقول تقدر تلون التوبيك وانت ماعندك بلس

بقوله ايه بس بيكون توبيكك قبل اكواد الألوان و ما راح يعرض بألوان
و لا تقدر تختار اللون و يطلع لك كود .. الا اذا كان عندك ملف حافظ فيه كود كل لون

راح استعرض لكم اهم المميزات اللي يعطيك اياها هالمملوح اللي اسمه " بلس "

أولاً /
يتيح لك امكانية الدخول بأكثر من ماسنجر و بنفس الوقت
يعني الباتشات اللي كنا نستخدمها اول عشان ندخل بأكثر من ماسنجر انسوها
و طريقتها كالتالي :

بعد ما ثبتنا البلس و اشتغل الماسنجر راح نلقى بالشريط فوق ان البلس اضيف لها .. اضغط عليها

نختار منها اعدادات

و نضغط على " الماسنجر " و بعدين نحط صح على " السماح بالإتصال بأكثر من حساب في نفس الوقت "

وبعدين موافق .. و مبروك عليك الحين تقدر تدخل بأكثر من ماسنجر

ثانياً
تبي تحط لك اختصارات ؟
مليت وانت كل شوي تكتب نفس الكلام ؟
بالعربي زول و متعيجز تكتبه مرتن ثانيه
البلس يوفر لك الراحه و الطمأنينه و الإستقرار

زيها زي اختصارات الدردشه .. يعني مثلا تبي لا كتبت " س1 " تطلع " السلام عليكم و رحمة الله وبركاته "
وهكذا ...
هذي طريقتها كالتالي :

ندخل على اعدادات

بعدين نضغط على " المحادثات " نختار منها " النصوص السريعة " وشف الصوره

وبعدين " تطبيق " ثمن " موافق "

ثالثاً :
عندك واحد بالماسنجر تبي تعرف متى آخر مره شفته اون لاين ؟
تبي تعرف متى آخر مره حاتسيته فيها ؟
هذي تنفع للي يبي يحذف ناس عنده بالماسنجر و يبي يشوف كم له عنهم
عشان كذا سموها " تنظيف جهات الإتصال "

طريقتها :

من قائمه بلس

نختار " تنظيف قائمه جهات الإتصال "

وبعدها تطلع لك البيانات

رابعاً :
رحت عن الجهاز شوي و رجعت و تبي تعرف وش صار وانت رايح ؟
وش الأحداث اللي صارت ؟
من حط مشغول ؟ من طلع ؟ من جا ؟ من غير نكه ؟
ابشر .. بلس ولد ام بلس يقولك ازهلها وانا اشوف وش يسوون لا تشيل هم

طريقتها :

من قائمه بلس

نختار " إظهار عارض الأحداث "

و سمّ شف البلس وش يعرض لك

خامساً :
تبي تحفظ سواليفك اللي بالماسنجر ؟
عشان لا واحد قالك كلام و رجع فيه تقفطه
البلس يوفر لك هالشئ

طريقتها :

من قائمه بلس

ندخل على اعدادات

ونضغط على " محادثات " و نختار منها " تسجيل المحادثات "

اذا مابغيت البلس يحفظ المحادثات شل علامة الصح من " حزن محادثاتي في سجلات افتراضيا "

سادساً :
تبي تقوم عن الجهاز و ما تبي احد يطل على ماسنجرك ؟
انت قاعد على الماسنجر و فجأه لقيت خشة احد بجنبك قالط بالشاشه ؟
" قفل الماسنجر " يعطيك خاصية تقفل الماسنجر حتى بإختصار للكيبورد و بعد
يقدم لك خيار انك تحط رقم سري لإستعادة الماسنجر " فتحه من جديد "

طريقتها :

من قائمه بلس

ندخل على اعدادات

نضغط على " الماسنجر " و نختار منها " قفل الماسنجر "

طبعا قفل الماسنجر ما يسوي تسجيل خروج لا .. بس اللهم كأنك ضاغط على علامة الإكس اللي فوق

تقدر تحط لها اختصار بالكيبورد او انك تسويها بهالطريقة

من قائمه بلس

نضغط على " قفل الماسنجر "

طبعا اذا حطيتوا " رقم سري للإستعاده " اول ما تضغطون على ايقونة الماسنجر دبل كليك بالماوس راح يطلب الباسوورد

يعني ارتاح لا رحت عن الجهاز و استخدمت قفل الماسنجر برقم سري .. مافيه ملقوف بيفتح ماسنجرك ويتفرج عليه

سابعاً
زهقت من حركة بس " بالخارج "
تبي تحط لك حالات مخصصه مثلا : " نايم " .. " أصلي " .. " ألعب سوني " .. " اتفرج على فيلم "

تقدر تسوي لك اعدادات جاهزه و تستخدمها متى مابغيت

طريقتها :

من قائمه بلس

ندخل على اعدادات

ونضغط على " تهيئه " و نختار منها " الحاله المخصصه "

عقب ما تسوي حالاتك المخصصه .. اضغط تطبيق
بعدين متى ما بغيت تحط واحد من الحالات المخصصه اللي انت مسويها ... تسوي مثل هالصوره

وبتضاف للتوبيك حقك زي كذا

واذا تبي تضيف حالة وانت طالع .. يعني حاط بالخارج بس تبي تكتب وين رايح مثلا
اذا ضغطت على بالخارج

راح يفتح لك هالمربع ...
لك الخيار انك تكتب شئ او سكره و راح تكون حالتك بالخارج

ثامناً
تبي تضيف مقطع صوتي للماسنجر عشان ترسله لأخوياك لاسولفت معهم ؟
او مثلا مستحلي صوتك و تبي تضيفه و تروع به خلق الله

طريقتها :

لا فتحت محادثه مع اي جهة اتصال .. اضغط على رمز السماعه [ لا تقول وينه شف الصوره ]

بيفتح لك مستطيل فيه اصوات جاهزه تجي معه

اذا بغيت تضيف اصوات من عندك اضغط على مكتبة الأصوات راح يطلع لك هالمستطيل

طبعا بالمستطيل الفاضي راح يحط لك الأصوات اللي انت اضفتها
اذا بغيت تضيف من عندك اضغط على " صوت جديد " و تحدد من الخيارين اللي بالصوره فوق

تاسعاً:
اعجبتك صورة احد عندك بالمسن و قلت عطني اياها و عيّا ؟
تبي تسرقها ؟
تبي تسرق التوبيك حقه ؟
تبي تعرف معلومات عن جهة اتصال معينه .. يعني غير التوبيك ... غير الحاله .. إلخ

طريقتها :

اضغط على جهة الإتصال اللي تبيها بالزر اليمين بالماوس و بعدين انزل تحت على " خواص ماسنجر بلس " وبعدين " معلومات جهة الإتصال "

راح تطلع لك معلوماته كلها
طبعا التوبيك قدامك .. بس ضلله بالماوس و نسخه
و الصورة اضغط على " حفظ الصورة " ما عاد نحتاج برنامج سارق الصور

إحساس آسف بس انت الوحيد الأون لاين عندي

و بكذا عرضت لكم بعض مميزات و الإضافات اللي يضيفها البلس للماسنجر
طبعا هذي تعتبر اهمها و اكثرها استخداماً

اعذروني على الشرح المتواضع
و عارف ان الغالبيه يعرفون البلس و يعرفون استخداماته .. و لكن هالموضوع سدحته للي مايعرفونه
ما ادري ان كان نزل قبل شرح له والا لا ..
بس شرحته بأسلوبي << والله من زين الأسلوب

إحساس
قلوب من هنا لبكرا ... يسلموو على الختم

نشر الموضوع

الموضوع هذا افادنا كثير
نورت القسم بالمساهمه Very Happy

» كيف تعرف أنك في السعوديه